jan [_kama _ante _lawa _ale _ma _ale _sama _utala] li toki e sona pi pilin ante (nimi pi sona ni li sona pi pilin [_ante _li _ijo _jo _esun _nasin _awen _suli _ike _jo _ona _nena] lon toki [_ilo _nasin _len _ilo]). ona li toki e ni: pilin ante li kama lon tan sona mani ike. tan sona mani ike la jan pali li pilin ante tawa ijo tu tu. jan pali li pilin ante tawa ijo, tawa pali, tawa jan pali ante, tawa pilin jan.

jan li pali e ijo lon anpa jan ante la jan pali li jo ala e ijo ni. jan ante li esun e ijo ni li pana e mani tawa jan pali. nasin pi sona mani ike la ona li esun e ijo kepeken nanpa mani pi suli mute li kama jo e mani mute, taso ona li pana e mani lili tawa jan pali. tan ni la jan pali li ken ala kama jo e ijo-sama kepeken mani lili ona. kon ni li pilin ante tawa ijo.

jan pali li wile ala pali ike. taso nasin pi sona mani ike la jan pali li ken ala pali ala li ken ala kama jo e pali ante pona. jan mani li sona e ni: jan pali li ken ala tawa tan ona. tan ni la jan mani ike li ken pana e mani lili taso tawa jan pali li ken kute ala e wile pi jan pali e pilin pi jan pali. ken la kon pali en tomo pali li ike tawa sijelo pi jan pali, taso jan pali li ken ala pali ala tan ni: ona li wile kama jo e pali ante la ona li pali ala lon tenpo lili, taso ona li pali ala lon tenpo lili la ona li ken ala moku li moli. ni li pilin ante tawa pali.

jan pali li wile e pali pona sama jan pali ante. taso ona li utala e jan pali ante. ona li wile ala e pona tawa jan pali ante tan ni: ona li pilin e ni: jan pali ante li jo e pona la ona li ken ala jo e pona. ken la jan pali pi ma ante li utala e jan mani ike tan ni: jan pali pi ma ante li wile e mani pali pona e kon pali pona e tomo pali pona sama jan pali pi ma insa. taso jan pali pi ma insa li utala ala e jan mani ike li utala e jan pali pi ma ante tan ni: ona li wile ala pona tawa jan pali pi ma ante. ni li pilin ante tawa jan pali ante. tan ni la jan [_kama _ante _lawa _ale _ma _ale _sama _utala] li toki e ni: jan pali pi ma ale o kama wan!

pilin jan li pilin [_kama _ale _tawa _uta _nasin _sona _uta _wile _en _sona _en _nasin] lon toki [_tawa _olin _sona _ilo]. pilin jan li wile moku li olin li wile pali. jan li ken sitelen lape li toki e ijo mute lon lawa ona. jan li wile olin e jan ante li wile pali e musi kepeken pilin ona. nasin pi sona mani ike la jan li pali lon kon pali ike lon tomo pali ike. tan ni la jan li ken ala pali e musi ona. ni li pilin ante tawa pilin jan.